భోగాపురం అంతర్జాతీయ విమానాశ్రయం (Bhogapuram International Airport) కోసం ఉత్తరాంధ్ర ప్రజలు ఎంతకాలంగా ఎదురుచూస్తున్నారో అందరికీ తెలిసిందే. ఈ కల 2026 జూన్ నాటికి నిజం కానుందని అధికారికంగా ప్రకటించారు. విజయనగరం జిల్లా భోగాపురంలో అల్లూరి సీతారామరాజు పేరుతో నిర్మాణం జరుగుతున్న ఈ విమానాశ్రయం పనులు వేగంగా కొనసాగుతున్నాయి. జీఎంఆర్ సంస్థ ఆధ్వర్యంలో ఎల్ అండ్ టీ ద్వారా నిర్మాణం జరుగుతుండగా, గత ప్రభుత్వ కాలంలో కేవలం 31 శాతం మాత్రమే పూర్తయ్యాయి. అయితే ప్రస్తుత కూటమి ప్రభుత్వం అధిక ప్రాధాన్యతనిస్తూ ఇప్పటికే 80 శాతం పైగా పనులు పూర్తి చేయించింది.
విమానాశ్రయం పూర్తవగానే విశాఖపట్నం నుండి భోగాపురం చేరుకోవడం సులభతరం చేయడానికి ప్రభుత్వం బీచ్ కారిడార్ ప్రాజెక్టును ముందుకు తీసుకెళ్తోంది. రూ.2,800 కోట్లతో భూసేకరణ, రోడ్ల విస్తరణ, కొత్త ఎలివేటెడ్ కారిడార్ల నిర్మాణం చేపడుతున్నారు. ముఖ్యంగా విశాఖపట్నం పోర్టు నుండి భీమిలి మీదుగా మూలకొద్ది వరకు గోస్తనీ నదిపై బ్రిడ్జి నిర్మించనున్నారు. ఈ ప్రాజెక్టు పూర్తయితే విశాఖ నుంచి భోగాపురం ఎయిర్‌పోర్ట్‌కు 45 నిమిషాల్లో చేరుకోవచ్చని అధికారులు అంచనా వేస్తున్నారు.
భోగాపురం విమానాశ్రయానికి అనుబంధంగా 15 ప్రధాన అంతర్గత రహదారులను నాలుగు లైన్లుగా విస్తరించేందుకు వీఎంఆర్‌డీఏ ఇప్పటికే నిర్ణయం తీసుకుంది. ఈ రోడ్ల విస్తరణకు రూ.390 కోట్ల నిధులు కేటాయించగా, 2026 జూన్ నాటికి కనీసం ఏడు రోడ్లు పూర్తి చేసే లక్ష్యాన్ని పెట్టుకున్నారు. అలాగే విశాఖపట్నంలో పెరుగుతున్న ట్రాఫిక్ సమస్యను తగ్గించేందుకు నాలుగు ఎలివేటెడ్ కారిడార్ల నిర్మాణం కూడా ప్రణాళికలో భాగంగా ఉంది. అగనంపూడి నుండి కొమ్మాది వరకు ఉండే ఈ కారిడార్లు పూర్తయితే విశాఖ నగర ట్రాఫిక్ పరిస్థితి గణనీయంగా మెరుగుపడనుంది.
ఇప్పటికే భోగాపురం రన్‌వేపై విమానం ట్రయల్ రన్ నిర్వహించడంతో, ప్రాజెక్టు పనులు ఎలాంటి దిశగా సాగుతున్నాయో స్పష్టమైంది. అధికారులు మరో పది నెలల్లో అన్ని ఏర్పాట్లు పూర్తి చేసి, వచ్చే ఏడాది జూన్ నాటికి విమానాల రాకపోకలు ప్రారంభమయ్యేలా చర్యలు తీసుకుంటున్నారు. ఈ విమానాశ్రయం ప్రారంభమైతే ఉత్తరాంధ్ర ప్రాంతానికి ఆర్థికంగా కొత్త ఊపిరి తీసుకొస్తుందని నిపుణులు భావిస్తున్నారు. అంతర్జాతీయ ప్రమాణాలతో నిర్మితమవుతున్న భోగాపురం అంతర్జాతీయ విమానాశ్రయం, కేవలం ఆంధ్రప్రదేశ్‌కే కాకుండా మొత్తం తూర్పు భారతదేశానికి ఒక ప్రధాన ఎయిర్ ట్రావెల్ హబ్‌గా మారనుంది.
Also Read : Amaravati ORR Map: రూట్ వివరాలు, జిల్లాల వారీగా కవర్ అయ్యే గ్రామాలు