ఆంధ్రప్రదేశ్ అభివృద్ధి ప్రయాణంలో మరో కీలక ముందడుగు పడింది. 2029 నాటికి రాష్ట్రంలో 20 లక్షల ఉద్యోగాల కల్పన లక్ష్యంగా రాష్ట్ర ప్రభుత్వం వేగంగా చర్యలు చేపడుతోంది. ఈ క్రమంలో ఏర్పాటు చేసిన మంత్రుల ఉపసంఘం రెండో సమావేశం సోమవారం ఉండవల్లి నివాసంలో జరిగింది. ఈ సమావేశానికి ముఖ్యమంత్రి నారా చంద్రబాబు నాయుడు గారు కీలక దిశానిర్దేశం అందించగా, టీడీపీ ప్రధాన కార్యదర్శి నారా లోకేష్ గారు ప్రాధాన్యతతో కూడిన అంశాలపై ఆచరణాత్మక చర్చలు నిర్వహించారు.
పెట్టుబడులకు దారి:
రాష్ట్రానికి ఇప్పటికే రూ.8,73,220 కోట్ల పెట్టుబడులు వచ్చే అవకాశం ఉందని అధికారులు తెలిపారు. ఈ పెట్టుబడులు 5,27,824 మందికి ఉద్యోగాలను కల్పించే అవకాశాలు ఉన్నాయని స్పష్టం చేశారు. ఈ పెట్టుబడులను మరింత సమర్థంగా ఉపయోగించేందుకు “ఇన్వెస్ట్‌మెంట్ ట్రాకర్ పోర్టల్” ను అభివృద్ధి చేయాలని సూచనలు అందించాయి.
MSME ప్రోత్సాహానికి ప్రభుత్వం కట్టుబాటు:
MSME (మైక్రో, స్మాల్, మీడియం ఎంటర్ప్రైజెస్) రంగాలను పెద్దఎత్తున ప్రోత్సహించడం ద్వారా స్థానిక స్థాయిలో ఉద్యోగావకాశాలు కల్పించేందుకు రాష్ట్ర ప్రభుత్వం కృషి చేస్తోంది. పెట్టుబడులు పెట్టాలనుకునే పరిశ్రమలకు ప్రతిబంధకాలుగా ఉన్న విధానాలను సవరించి, మరింత పారదర్శకతతో అనుమతుల ప్రక్రియను వేగవంతం చేయనున్నట్లు నారా లోకేష్ గారు స్పష్టం చేశారు.
ప్రభుత్వ లక్ష్యం:
రాష్ట్రాన్ని పరిశ్రమల కేంద్రంగా మార్చేందుకు, ఆర్థిక అభివృద్ధిని వేగవంతం చేయడం ద్వారా యువతకు ఉద్యోగాల కల్పన లక్ష్యంగా ప్రభుత్వం పని చేస్తోంది. 2029 నాటికి 20 లక్షల ఉద్యోగాల కల్పన లక్ష్యం సాధనలో టీడీపీ నాయకత్వం కీలక పాత్ర పోషిస్తోంది.