ఏపీలో ఆ రైల్వే స్టేషన్ కు అభివృద్ధి జోరు.. ఎయిర్‌పోర్టు రేంజ్‌లో 14 ప్లాట్‌ఫాంలు

ఆంధ్రప్రదేశ్‌లో రైల్వే మౌలిక వసతుల అభివృద్ధి వేగం పెరుగుతోంది. అమృత్ భారత్ స్టేషన్ పథకం కింద రాష్ట్రంలోని అనేక స్టేషన్లను ఆధునిక సదుపాయాలతో తీర్చిదిద్దడానికి కేంద్ర ప్రభుత్వం కసరత్తు చేస్తోంది. ఇందులో భాగంగా విశాఖపట్నం రైల్వే స్టేషన్ పునర్నిర్మాణానికి ప్రత్యేక ప్రాధాన్యం ఇవ్వబడింది. దాదాపు ₹466 కోట్ల భారీ వ్యయంతో ఈ స్టేషన్ రూపురేఖలను పూర్తిగా మార్చే పనులు ప్రారంభమయ్యాయి. ప్రస్తుతం ఉన్న ఎనిమిది ప్లాట్‌ఫాంలకు అదనంగా మరో ఆరు ప్లాట్‌ఫాంలు నిర్మించబోతున్నారు. ఈ విస్తరణతో మొత్తం ప్లాట్‌ఫాంల సంఖ్య 14కి చేరనుంది.

ప్రయాణికుల రద్దీ పెరుగుతుండటంతో, రైళ్ల రాకపోకలు మరింత సులభతరం చేయాలన్న ఉద్దేశంతో విశాఖ స్టేషన్‌ను అంతర్జాతీయ ప్రమాణాలతో అభివృద్ధి చేస్తున్నారు. వాణిజ్య, సాంస్కృతిక కేంద్రంగా మారే విధంగా కొత్త నిర్మాణాలు, సదుపాయాలు కల్పించనున్నారు. రెండు ఎస్కలేటర్లు, ఎయిర్ కాన్‌కోర్స్, ఆధునిక వెయిటింగ్ ఏరియాలు, మెరుగైన లైటింగ్, ప్రయాణికుల సౌకర్యాల కోసం విస్తృత స్థాయిలో పనులు చేపడతారు. ఈ ప్రాజెక్టు 2027 నాటికి పూర్తిచేయాలని లక్ష్యంగా పెట్టుకున్నారు.

గతంలో ఈ పునర్నిర్మాణ పనులు కోర్టు వివాదాల కారణంగా నిలిచిపోయాయి. గోపాలపట్నం–విశాఖ స్టేషన్ల మధ్య అదనంగా రెండు ట్రాక్‌లు వేసే ప్రణాళిక కూడా ఇందులో భాగమే. కోర్టు కేసు పరిష్కారమవడంతో ప్రాజెక్టుకు సంబంధించిన డీపీఆర్ రైల్వే బోర్డుకు పంపించగా, ఇప్పుడు ఆమోదం కోసం ఎదురుచూస్తున్నారు.

దేశంలో అత్యధిక రద్దీగల తొలి 20 రైల్వే స్టేషన్లలో విశాఖ రైల్వే స్టేషన్ ఒకటి. సాధారణ రోజుల్లో ఇక్కడ 50,000 నుండి 60,000 మంది వరకు ప్రయాణిస్తారు. పండుగల సమయంలో ఈ సంఖ్య 75,000 దాటుతుంది. ఈ పెరుగుతున్న అవసరాలను దృష్టిలో ఉంచుకుని మౌలిక వసతుల విస్తరణ అత్యవసరమని రైల్వే శాఖ నిర్ణయించింది. అభివృద్ధి పనులు పూర్తయ్యాక, విశాఖ రైల్వే స్టేషన్ ప్రయాణికులకు ఎయిర్‌పోర్టు స్థాయి సౌకర్యాలు అందించే అత్యాధునిక హబ్‌గా మారనుంది.

Also Read : స్త్రీ శక్తి పథకం: ఎలాంటి గుర్తింపు కార్డులు చూపించి ఉచిత ప్రయాణం చేయచ్చు? ఏ బస్సుల్లో వర్తిస్తుంది?