తెలంగాణ ప్రభుత్వం మరోమారు మానవతా దృష్టికోణంతో దివ్యాంగులు మరియు ట్రాన్స్‌జెండర్లకు మంచి అవకాశం కల్పించింది. వీరి ఆర్థిక, సామాజిక స్థితిని బలోపేతం చేయడానికి రాష్ట్ర ప్రభుత్వం ప్రత్యేక ఉపాధి పునరావాస పథకాన్ని ప్రవేశపెట్టింది. 2025-26 ఆర్థిక సంవత్సరానికి గాను ఈ పథకం అమలులోకి రానుంది. దివ్యాంగులు, ట్రాన్స్‌జెండర్లు స్వయం ఉపాధి అవకాశాల ద్వారా జీవనోపాధిని ఏర్పరుచుకునేలా చర్యలు తీసుకుంటోంది ప్రభుత్వం.
పథకం ముఖ్యాంశాలు:
ఈ పథకం కింద లబ్ధిదారులకు బ్యాంక్ లింకేజీ అవసరం లేకుండా నేరుగా నిధులను అందజేయనున్నారు. సబ్సిడీ వివరాలు ఇలా ఉన్నాయి:
- 100% సబ్సిడీతో రూ.50,000 మంజూరు
- 80% సబ్సిడీతో రూ.1,00,000
- 70% సబ్సిడీతో రూ.2,00,000
- 60% సబ్సిడీతో రూ.3,00,000 వరకు సహాయం
ఈ అవకాశాన్ని పొందాలనుకునే దివ్యాంగులు, ట్రాన్స్‌జెండర్లు 2025 జూలై 14 నుండి 31వ తేదీ వరకు ఆన్‌లైన్‌లో దరఖాస్తు చేసుకోవాలి. దరఖాస్తు కోసం అధికారిక వెబ్‌సైట్: https://tgobmms.cgg.gov.in
అర్హతలు ఈ విధంగా ఉన్నాయి:
- కనీసం 40 శాతం దివ్యాంగత తప్పనిసరి.
- వయసు 21 నుండి 55 సంవత్సరాల మధ్య ఉండాలి.
- గ్రామీణ ప్రాంతాల్లో వార్షిక ఆదాయం రూ.1.5 లక్షల లోపు, పట్టణ ప్రాంతాల్లో రూ.2 లక్షల లోపు ఉండాలి.
- గత ఐదు సంవత్సరాల్లో ఎలాంటి ప్రభుత్వ సబ్సిడీ పొందకూడదు.
అన్ని దరఖాస్తుల పరిశీలన తర్వాత జిల్లా స్థాయి సెలెక్షన్ కమిటీ ద్వారా ఎంపిక జరుగుతుంది. కరీంనగర్ జిల్లాలో ఇప్పటికే 21 యూనిట్లను మంజూరు చేశారు.
ట్రాన్స్‌జెండర్లకు నైపుణ్య శిక్షణ:
నిరుద్యోగంగా ఉన్న ట్రాన్స్‌జెండర్లకు ప్రత్యేక నైపుణ్య శిక్షణ కార్యక్రమాలను కూడా రాష్ట్ర ప్రభుత్వం చేపట్టింది. ఇందులో భాగంగా వివిధ రంగాల్లో శిక్షణలు అందించనున్నారు:
- డ్రైవింగ్
- ఫోటోగ్రఫీ & వీడియో గ్రాఫీ
- బ్యూటీషియన్
- జ్యూట్ బ్యాగ్ తయారీ
- లాజిస్టిక్స్ & సప్లై చైన్ మేనేజ్‌మెంట్
ఈ శిక్షణ పూర్తైన తర్వాత ప్రైవేట్ రంగంలో ఉద్యోగ అవకాశాలు కల్పించేందుకు ప్రణాళిక సిద్ధం చేశారు. ఈ శిక్షణ కార్యక్రమాలకు దరఖాస్తు తేదీ జూలై 23, 2025 వరకు మాత్రమే ఉంటుంది.
ఈ అవకాశాన్ని పొందాలనుకునే వారు తెలంగాణ రాష్ట్రానికి చెందాలని, సంబంధిత శిక్షణలో ఆసక్తి మరియు ప్రాథమిక అర్హతలు కలిగి ఉండాలని అధికారులు స్పష్టం చేశారు.
Also Read : Tippa Teega: తిప్పతీగతో ఆరోగ్యానికి అద్భుత ప్రయోజనాలు – రోజూ 2 ఆకులు చాలు!