రోహిత్ శర్మ, విరాట్ కోహ్లీ టెస్ట్ రిటైర్మెంట్ వెనుక బీసీసీఐ అంతర్గత రాజకీయాలే కారణమా? మాజీ ఆటగాడు కర్సన్ ఘావ్రీ సంచలన వ్యాఖ్యలు. వన్డే కెరీర్ భవిష్యత్తుపై కూడా అనుమానాలు.
రోహిత్ శర్మ, విరాట్ కోహ్లీ పేర్లు భారత క్రికెట్ చరిత్రలో ఎప్పటికీ నిలిచిపోయేలా రాసుకున్నారు. ఈ ఇద్దరు లెజెండరీ ఆటగాళ్లు ఇటీవల టెస్ట్ ఫార్మాట్‌కు వీడ్కోలు పలకడం అభిమానులకు గట్టి షాక్ ఇచ్చింది. ఇంగ్లాండ్ పర్యటనకు ముందు రోహిత్, కోహ్లీలు రిటైర్మెంట్ ప్రకటించడం వెనుక అసలు కారణం ఏమిటన్న దానిపై ఊహాగానాలు విస్తరించాయి. ముఖ్యంగా మాజీ భారత ఫాస్ట్ బౌలర్ కర్సన్ ఘావ్రీ చేసిన వ్యాఖ్యలు ఇప్పుడు పెద్ద చర్చకు దారితీశాయి. ఆయన అభిప్రాయం ప్రకారం రోహిత్ శర్మ, విరాట్ కోహ్లీ రిటైర్మెంట్ స్వచ్ఛందంగా తీసుకున్న నిర్ణయం కాదని, బీసీసీఐ అంతర్గత రాజకీయాల వలనే వారు ముందుగానే తప్పుకోవాల్సి వచ్చిందని పేర్కొన్నారు.
ఘావ్రీ అభిప్రాయం ప్రకారం విరాట్ కోహ్లీ కనీసం మరో రెండు సంవత్సరాలు టెస్ట్ జట్టులో ఆడే స్థాయిలో ఉన్నారని, కానీ అతనికి వీడ్కోలు మ్యాచ్ కూడా ఇవ్వకపోవడం ఆశ్చర్యకరమని అన్నారు. కోహ్లీ, రోహిత్ ఇద్దరూ భారత క్రికెట్ జట్టు మేనేజ్‌మెంట్‌లోని కొన్ని అంతర్గత నిర్ణయాల బారిన పడ్డారని ఆయన ఆరోపించారు. ఆయన మాటల్లో, “వారిని బయటకు వెళ్లమని చెప్పబడింది, వారు కొనసాగాలని కోరుకున్నారు. కానీ సెలెక్టర్లు, బీసీసీఐ ఆలోచనలు వేరే విధంగా ఉండటంతో ముందుగానే రిటైర్మెంట్ తీసుకోవాల్సి వచ్చింది” అని స్పష్టం చేశారు.
అసలు ఈ ఇద్దరు ఆటగాళ్లు 2024 టీ20 ప్రపంచ కప్ తర్వాత టీ20 ఫార్మాట్‌కు కూడా గుడ్‌బై చెప్పారు. ఇప్పుడు వన్డేల్లో మాత్రమే కొనసాగుతున్నారు. అయితే, ఈ ఏడాది అక్టోబర్‌లో జరిగే ఆస్ట్రేలియా వన్డే సిరీస్ రోహిత్ శర్మ, విరాట్ కోహ్లీ చివరి అంతర్జాతీయ సిరీస్ కావచ్చనే ఊహాగానాలు జోరుగా వినిపిస్తున్నాయి. దీనిపై అధికారిక ప్రకటన ఏదీ లేకపోయినా, అభిమానుల్లో గట్టి ఆందోళన నెలకొంది.
భారత క్రికెట్‌లో కొత్త తరానికి అవకాశం కల్పించాలనే ఉద్దేశంతోనే ఈ నిర్ణయాలు తీసుకున్నారనేది ఒక వాదన. కానీ, రోహిత్ శర్మ, విరాట్ కోహ్లీ స్థాయిలో ఉన్న ఆటగాళ్లను అకస్మాత్తుగా జట్టులోంచి తప్పించడం సరైన నిర్ణయమా అన్న చర్చ కొనసాగుతోంది. ముఖ్యంగా ఈ ఇద్దరి కృషి, అంకితభావం, టీమ్ ఇండియాకు అందించిన విజయాలు మరచిపోలేనివి. ఇప్పుడు అభిమానులు వీరి వన్డే కెరీర్ కూడా ముగుస్తుందేమోనని ఆందోళన చెందుతున్నారు. ఏది ఏమైనా, రోహిత్ శర్మ, విరాట్ కోహ్లీ రిటైర్మెంట్ వెనుక ఉన్న నిజం ఇంకా బయటకు రాకపోయినా, భారత క్రికెట్‌లో ఇది పెద్ద చర్చనీయాంశంగా మారింది.
Also Read : Amaravati ORR Map: రూట్ వివరాలు, జిల్లాల వారీగా కవర్ అయ్యే గ్రామాలు