Income Tax Calculator 2025: మీ ఆదాయంపై ఎంత పన్ను వస్తుందో వెంటనే లెక్కించుకోండి

Income Tax Calculator : ఇప్పుడు పన్ను చెల్లింపుదారులకు ఒక సులభమైన మార్గం అందుబాటులోకి వచ్చింది. ఎవరికి ఎంత ఆదాయంపై ఎంత టాక్స్ వస్తుందో ఇప్పుడు క్షణాల్లోనే తెలుసుకోవచ్చు. ఇందుకోసం ఆదాయపు పన్ను శాఖ ప్రత్యేకంగా ఒక టాక్స్ కాలిక్యులేటర్‌ను తీసుకొచ్చింది. దీని సహాయంతో పాత పన్ను విధానం, కొత్త పన్ను విధానం ప్రకారం లెక్కలు వేసుకుని, తాము ఎంత పన్ను చెల్లించాల్సి ఉంటుందో సులభంగా అర్థం చేసుకోవచ్చు.

ప్రస్తుతం 2024–25 ఆర్థిక సంవత్సరానికి సంబంధించిన ఆదాయంపై టాక్స్ రిటర్నులు ఫైల్ చేయాల్సి ఉంది. దీనికి గడువు సెప్టెంబర్ 15 వరకు మాత్రమే ఉండగా, ఆ తర్వాత ఆలస్యమైతే జరిమానా తప్పదు. ఇప్పటివరకు కోట్లు మంది పన్ను చెల్లింపుదారులు తమ రిటర్న్స్ దాఖలు చేసినప్పటికీ, ఇంకా చాలామంది ఈ ప్రక్రియ పూర్తి చేయాల్సి ఉంది. చాలా మందికి ప్రధానంగా ఎదురయ్యే సమస్య ఏమిటంటే, తాము ఎంత టాక్స్ కట్టాలో అంచనా వేయలేకపోవడమే.

గత కొంతకాలంగా ఇన్‌కమ్ టాక్స్ నిబంధనల్లో అనేక మార్పులు చోటు చేసుకున్నాయి. ముఖ్యంగా కొత్త పన్ను విధానాన్ని ప్రభుత్వం మరింత ఆకర్షణీయంగా మార్చింది. ఈ క్రమంలో స్టాండర్డ్ డిడక్షన్‌ను 75 వేల రూపాయలకు పెంచింది. అలాగే సెక్షన్ 87A కింద రిబేట్ పరిమితి కూడా పెరిగింది. ముఖ్యంగా 2025 బడ్జెట్ ప్రకారం, కొత్త విధానంలో 12 లక్షల వరకు ఆదాయంపై ఎలాంటి టాక్స్ ఉండదు. వేతన జీవులకు స్టాండర్డ్ డిడక్షన్ కలిపి 12.75 లక్షల వరకు పన్ను మినహాయింపు లభిస్తుంది. అయితే ఇది 2025 ఏప్రిల్ 1 నుంచి అమల్లోకి రానుంది. అంటే 2025–26 ఆర్థిక సంవత్సరంలో సంపాదించిన ఆదాయంపై, 2026–27లో ఐటీఆర్ ఫైల్ చేసేటప్పుడు ఇది వర్తిస్తుంది. కానీ ప్రస్తుతం ఫైల్ చేస్తున్న రిటర్న్స్ 2024–25 ఆదాయ సంవత్సరానికి సంబంధించినవి కాబట్టి, పాత రూల్స్‌నే పాటించాలి. పాత విధానంలో రిబేట్ పరిమితి 7 లక్షల వరకే ఉండగా, వేతన జీవులకు స్టాండర్డ్ డిడక్షన్ 75 వేలుగా ఉంటుంది. ఇక పాత విధానం ప్రకారం 5 లక్షల వరకు ఆదాయంపై ఎలాంటి పన్ను ఉండదు.

ఇప్పుడు ఈ కాలిక్యులేటర్ ద్వారా లెక్కలు వేసుకోవడం చాలా ఈజీ. ముందుగా అసెస్‌మెంట్ ఇయర్ ఎంపిక చేసుకోవాలి. ఉదాహరణకు, ప్రస్తుతానికి 2025–26ను ఎంచుకోవాలి. తర్వాత టాక్స్ పేయర్ ఆప్షన్‌లో వ్యక్తిగతం, హెచ్‌యూఎఫ్ లేదా కంపెనీ అనే ఆప్షన్లలో సరైనది ఎంచుకోవాలి. అలాగే వయసు కేటగిరీ, నివాస స్థితి వంటి వివరాలు ఇచ్చిన తర్వాత, మీకు ఉన్న మొత్తం ఆదాయాన్ని ఎంటర్ చేయాలి. స్టాండర్డ్ డిడక్షన్, ఇతర మినహాయింపులు తీసివేసిన తర్వాత మిగిలిన ఆదాయంపై పన్ను లెక్క కడుతుంది. చివరగా సెక్షన్ 87A రిబేట్ ఉంటే అది తీసేయబడుతుంది. దాంతో మీరు చెల్లించాల్సిన ఖచ్చితమైన టాక్స్ మొత్తం కనిపిస్తుంది. ఆపై దానిపై హెల్త్ అండ్ ఎడ్యుకేషన్ సెస్‌గా అదనంగా 4 శాతం చెల్లించాలి.

మరి ఒకసారి ప్రయత్నించి చూస్తే, ప్రస్తుత ఆర్థిక సంవత్సరానికి సంబంధించిన టాక్స్ మాత్రమే కాకుండా, రాబోయే సంవత్సరం లెక్కలు కూడా వేసుకోవచ్చు. ముఖ్యంగా కొత్త విధానం కింద 12 లక్షల వరకు ఎలాంటి పన్ను ఉండదని అర్థం చేసుకోవచ్చు. ఇలా ముందుగానే అవగాహన ఏర్పరుచుకోవడం వల్ల రాబోయే టాక్స్ ప్లానింగ్‌లో కూడా సౌలభ్యం కలుగుతుంది.