హైదరాబాద్ రీజినల్ రింగ్ రోడ్ లో ఖరారైన జిల్లాలు, గ్రామాలు

హైదరాబాద్ పరిసర ప్రాంతాల అభివృద్ధికి ఊతమిచ్చే ప్రతిష్టాత్మక రీజినల్ రింగ్ రోడ్ (RRR) ప్రాజెక్టు మరో కీలక దశలోకి ప్రవేశించింది. ఈ ప్రాజెక్టుకు సంబంధించి హైదరాబాద్ మెట్రోపాలిటన్ డెవలప్‌మెంట్ అథారిటీ (HMDA) తాజాగా ప్రాథమిక నోటిఫికేషన్ విడుదల చేసింది.

ఈ రహదారి 100 మీటర్ల వెడల్పుతో నిర్మాణం కానుంది. ప్రస్తుతం ఉన్న ఔటర్ రింగ్ రోడ్డుకు దూరంగా, సుమారు 40 కిలోమీటర్ల పరిధిలో ఈ కొత్త రింగ్ రోడ్ రెండు భాగాలుగా నిర్మించబడనుంది. ఎనిమిది జిల్లాల మీదుగా, అనేక మండలాలు, రెవెన్యూ గ్రామాలను దాటేలా ఈ ప్రాజెక్టు రూపకల్పన జరిగింది.

అధికారుల సమాచారం ప్రకారం, రీజినల్ రింగ్ రోడ్ కారణంగా రవాణా సౌకర్యాలు గణనీయంగా మెరుగుపడతాయి, అలాగే ఆ ప్రాంతాల్లో భూముల విలువలు పెరుగుతాయి. ప్రజల నుంచి వచ్చిన అభ్యంతరాలు, సూచనలను పరిశీలించిన తరువాత తుది నోటిఫికేషన్ విడుదల చేస్తామని హెచ్‌ఎండీఏ తెలిపింది. సెప్టెంబర్ 15 లోపు ఎవరికైనా అభ్యంతరాలు ఉంటే రాతపూర్వకంగా సమర్పించవచ్చు.

ఈ నోటిఫికేషన్‌కు సంబంధించిన డిజిటల్ మ్యాప్, సర్వే నంబర్లు, పూర్తి వివరాలు హెచ్‌ఎండీఏ అధికారిక వెబ్‌సైట్‌లో ఇప్పటికే అందుబాటులో ఉన్నాయి.

రీజినల్ రింగ్ రోడ్‌లో చేరిన జిల్లాలు, గ్రామాలు

యాదాద్రి-భువనగిరి జిల్లా

మల్లాపూర్‌, దత్తార్‌పల్లి, గౌస్‌నగర్‌, కేసారం, తుక్కాపురం, పెంచికల్‌పహడ్‌, రాయిగిరి, తంగడ్‌పల్లి, నేలపట్ల, చిర్యాల, కంకణగూడెం, కొనపురం, వీరరెడ్డిపల్లి, వర్కట్‌పల్లి, పొద్దుటూర్‌ తదితర గ్రామాలు.

నల్లగొండ జిల్లా

వెల్మకన్నె, గట్టుప్పల్‌, తేరట్‌పల్లి, మర్రిగూడ, భీమనపల్లె, సరంపేట్‌, కుర్మేడ్, మల్లెపల్లె, వింజమూర్‌ మొదలైన గ్రామాలు.

రంగారెడ్డి జిల్లా

ఆమన్‌గల్‌, చెన్నంపల్లె, సింగంపల్లె, తొమ్మిడికుల, బీమారం, చించోడు, కొందుర్గు (ఈస్ట్‌, వెస్ట్‌), మాడ్గూల్‌, కలకొండ, తలకొండపల్లె, రాంపూర్‌, జులపల్లె తదితర ప్రాంతాలు.

వికారాబాద్ జిల్లా

వికారాబాద్ మండలంలోని బురాన్‌పల్లి, పాతూరు, పులుసుమామిడి, నవాబ్‌పేట మండలంలోని యావాపూర్‌, చిట్టిగిద్ద, మోమిన్‌పేట, పూడూరు, రాకంచర్ల, తుర్క ఎన్కేపల్లి మొదలైన గ్రామాలు.

సంగారెడ్డి జిల్లా

సంగారెడ్డి, నాగపూర్‌, కలబ్గుర్‌, హత్నూర్ మండలంలోని దౌల్తాబాద్‌, సికంద్లాపూర్‌, కొండాపూర్ మండలంలోని అలియాబాద్‌, మారేపల్లి, గంగారం తదితర గ్రామాలు.

సిద్దిపేట జిల్లా

గజ్వేల్‌, మక్తామాసాన్‌పల్లి, ప్రజ్ఞాపూర్‌, సంగాపూర్‌, చేబర్తి, ఎర్రవల్లి, పాములపర్తి, జబ్బాపూర్‌, మక్తా మైలారం వంటి గ్రామాలు.

మెదక్ జిల్లా

నర్సాపూర్ మండలంలోని చిన్నచింతకుంట, ఖాజీపేట్‌, తిర్మలాపూర్‌, జానకంపేట్‌, నాగుల్‌పల్లి, శివంపేట్ మండలంలోని గుండ్లపల్లి, పోతులబొగూడ, తూప్రాన్ మండలంలోని కిష్టాపూర్‌, వట్టూర్‌, ఇస్లాపూర్‌ మొదలైన ప్రాంతాలు.