Gundrampally : నిజాం రజాకార్లకు ఎదురొడ్డి పోరాడిన వీర భూమి

Gundrampally : నల్లగొండ జిల్లా గుండ్రాంపల్లి గ్రామం తెలంగాణ సాయుధ పోరాట చరిత్రలో చిరస్థాయిగా నిలిచిన ప్రదేశం. నిజాం హయాంలో రజాకార్ల దౌర్జన్యాలను ఎదుర్కొంటూ ఈ గ్రామం రక్తసిక్తమైంది. తెలంగాణ విముక్తి కోసం గుండ్రాంపల్లిలో ప్రజలు గట్టి ప్రతిఘటన చూపారు.

తెలంగాణ విముక్తి పోరాటం – గుండ్రాంపల్లి పాత్ర

సెప్టెంబర్ 17, 1948, తెలంగాణ చరిత్రలో అత్యంత ప్రాముఖ్యమైన రోజు. ఈరోజే హైదరాబాద్ సంస్థానం భారతదేశంలో విలీనం అయ్యింది. కానీ ఈ స్వేచ్ఛ కోసం ప్రజలు ఎన్నో కష్టనష్టాలు అనుభవించారు. నిజాం పాలనలో రజాకార్లు ప్రజలపై అమానుషంగా వ్యవహరించారు. గుండ్రాంపల్లి ప్రజలు వారి దురాగతాలకు తలొగ్గకుండా వీరోచితంగా పోరాడారు.

గుండ్రాంపల్లి మసీదు – ఓ దుఃఖ సాక్ష్యం

నిజాం పాలకుల అండదండలతో రజాకార్లు అమాయక ప్రజలను ఊచకోత కోశారు. గుండ్రాంపల్లి మసీదు వారి దారుణాలకు సాక్ష్యంగా నిలిచింది. నాటి ఘోర ఘటనల్లో వందల మందిని ఈ మసీదు దగ్గర చంపేశారు.

ఖాసిం రజ్వీ అనుచరుడిగా మక్బుల్ దోపిడీలు

రజాకార్లలో అత్యంత క్రూరుడిగా పేరొందిన ఖాసిం రజ్వీ అనుచరుడైన మక్బుల్, గుండ్రాంపల్లిని తన అరాచకాలకు అడ్డాగా మార్చుకున్నాడు. 50 మంది అనుచరులతో గ్రామంలో మారణహోమం సృష్టించాడు. అమాయకులపై దాడులు, దోపిడీలు, మహిళలపై అఘాయిత్యాలకు పాల్పడ్డాడు. ప్రతిఘటించే వారిని తీవ్రంగా శిక్షించేవాడు.

కమ్యూనిస్టు దళాలు – రజాకార్లకు ప్రతిస్పందన

ఆ కాలంలో కమ్యూనిస్టు దళాలు, రజాకార్లు ఎదురెదురుగా పోరాడేవి. మక్బుల్ ఇంటిపై కమ్యూనిస్టులు చేసిన దాడిలో అతని భార్య, కుమార్తె మరణించారు. దీనికి ప్రతీకారంగా మక్బుల్ తన అణచివేతను మరింత పెంచి, 350 మందికి పైగా గ్రామస్తులను చంపించాడు. వారి మృతదేహాలను మసీదు పక్కన ఉన్న బావిలో పడేశాడు.

గుండ్రాంపల్లి అమరవీరుల స్మారక స్థూపం

1993లో గ్రామస్థులు అమరవీరుల త్యాగాన్ని గుర్తుచేసేందుకు స్మారక స్థూపాన్ని నిర్మించారు. అయితే, 65వ నెంబర్ జాతీయ రహదారి విస్తరణలో ఈ స్థూపాన్ని తొలగించారు. గ్రామస్తుల నిరసనతో మరో ప్రాంతంలో అమరవీరుల స్మారకాన్ని నిర్మించారు. ప్రతి సంవత్సరం వీరుల త్యాగాలను స్మరించుకుంటూ గ్రామస్థులు నివాళులు అర్పిస్తారు.

గుండ్రాంపల్లి చరిత్ర భావితరాలకు మార్గదర్శి

గుండ్రాంపల్లి గ్రామం తెలంగాణ విముక్తి పోరాటంలో పోరాడిన నిబద్ధతను ప్రతిబింబించే చిహ్నం. ఈ చరిత్రను భావితరాలకు అందించేందుకు పుస్తకాల రూపంలో ప్రచురిస్తున్నట్లు గ్రామస్థులు తెలిపారు.

Also Read : Divi seema Uppena