Did Students Miss the JEE Exam Due to Pawan Kalyan’s Convoy: పవన్ కల్యాణ్ కాన్వాయ్ వల్లే జేఈఈ అభ్యర్థులు పరీక్ష రాయలేకపోయారా? – విశాఖలో తీవ్ర గందరగోళం

ఆంధ్రప్రదేశ్ ఉప ముఖ్యమంత్రి పవన్ కల్యాణ్ కాన్వాయ్ కారణంగా కొంతమంది విద్యార్థులు జేఈఈ మెయిన్స్ పరీక్ష రాయలేకపోయామని తల్లిదండ్రులు కన్నీటి పర్యంతమవుతూ చెప్పారు. ఏప్రిల్ 7న సోమవారం జరిగిన ఈ సంఘటనకు సంబంధించిన వీడియోలు సోషల్ మీడియాలో వైరల్ అవుతున్నాయి.

విశాఖపట్నం జిల్లా పెందుర్తి నియోజకవర్గంలోని చినముషిడివాడ వద్ద ఉన్న అయాన్ డిజిటల్ జోన్ పరీక్షా కేంద్రానికి వెళ్తుండగా, ట్రాఫిక్ ఆంక్షల వల్ల సమయానికి చేరుకోలేకపోయారని విద్యార్థులు, వారి తల్లిదండ్రులు ఆరోపిస్తున్నారు. ఉప ముఖ్యమంత్రి పర్యటన నేపథ్యంలో ట్రాఫిక్ నియంత్రణకై పోలీసులు కొన్ని మార్గాలను మూసివేయడంతో విద్యార్థులు పరీక్ష కేంద్రాల వద్దకు ఆలస్యంగా చేరారు.

జేఈఈ అభ్యర్థి హాసిని తండ్రి అనిల్ మాట్లాడుతూ, “మేము ఉదయం 8:30కి ముందే బయల్దేరాం. కానీ పవన్ కల్యాణ్ కాన్వాయ్ పెందుర్తి మీదుగా వెళ్లుతుందని పోలీసులు ట్రాఫిక్ ఆంక్షలు విధించారు. వాటిని దాటి పరీక్షా కేంద్రానికి చేరేసరికి రెండు నిమిషాల ఆలస్యం అయింది. కానీ మా అమ్మాయిని లోపలికి అనుమతించలేదు” అని ఆవేదన వ్యక్తం చేశారు.

ఇంతకీ తమంతట వారు చేసిన ఆలస్యం కాదని, ట్రాఫిక్ ఆంక్షల వల్లే పరీక్షను కోల్పోయామని వివరిస్తూ పలువురు తల్లిదండ్రులు, విద్యార్థులు భావోద్వేగానికి లోనయ్యారు. “మా పిల్లలు మూడు గంటల ముందే బయలుదేరినా చివరికి రెండు నిమిషాల తేడాతో పరీక్ష రాయలేకపోయారు. ఇంత కష్టపడిన ఫలితం వృథా అయింది” అంటూ ఒక తల్లి కన్నీళ్లు పెట్టుకున్నారు.

దాదాపు 30 మంది విద్యార్థులు ఇలానే పరీక్షను కోల్పోయారని సమాచారం. ఈ సంఘటనపై వెంటనే స్పందించిన జనసేన పార్టీ, పరీక్ష రాయలేకపోయిన విద్యార్థుల విషయాన్ని గమనించిన పవన్ కల్యాణ్ ఈ ఘటనపై సమగ్ర విచారణ జరిపించాలని ఆదేశించినట్లు ఒక ప్రకటనలో వెల్లడించింది.

ఈ నేపథ్యంలో మంగళవారం జేఈఈ మెయిన్స్ పరీక్షకు చివరి రోజు. సోమవారం పరీక్ష మిస్ అయిన విద్యార్థులకు మరో అవకాశం ఇవ్వాలంటూ ఉప ముఖ్యమంత్రి పవన్ కల్యాణ్, ముఖ్యమంత్రి చంద్రబాబు, విద్యాశాఖ మంత్రి నారా లోకేష్‌లకు అభ్యర్థుల తల్లిదండ్రులు విజ్ఞప్తి చేస్తున్నారు.

ఇది విద్యార్థుల భవిష్యత్తు మీద ప్రభావం చూపించే విషయం కావడంతో అధికారులు సానుభూతి దృష్టితో వ్యవహరించాలని కోరుతున్నారు. ట్రాఫిక్ యాజమాన్యంలో ఏర్పడిన లోపాలను సరిచూడాల్సిన అవసరం ఉన్నదనే అంశం ఈ సంఘటన ద్వారా స్పష్టమవుతోంది.