రామ్ చరణ్, థమన్ వివాదం: గేమ్ ఛేంజర్ పై క్లారిటీ

గేమ్ ఛేంజర్ సినిమాకు సంబంధించిన మ్యూజిక్ డైరెక్టర్ ఎస్.థమన్ చేసిన వ్యాఖ్యలు ఇటీవల సోషల్ మీడియాలో చర్చనీయాంశంగా మారాయి. సినిమాలో సరైన హుక్ స్టెప్‌లు లేకపోవడం వల్ల పాటలు పెద్దగా ఆదరణ పొందలేదని థమన్ పేర్కొనడంతో, మెగా ఫ్యాన్స్ అతనిపై అసహనాన్ని వ్యక్తం చేస్తున్నారు. ఈ పరిణామాల నేపథ్యంలో హీరో రామ్ చరణ్ థమన్‌ను సోషల్ మీడియాలో అన్‌ఫాలో చేశారని వార్తలు చక్కర్లు కొట్టాయి. అయితే తాజాగా ఈ విషయంపై చెర్రీ టీమ్ స్పందిస్తూ స్పష్టత ఇచ్చింది.

మెగా పవర్ స్టార్ రామ్ చరణ్ హీరోగా, శంకర్ దర్శకత్వంలో రూపొందిన ‘గేమ్ ఛేంజర్’ సినిమా సంక్రాంతి సందర్భంగా విడుదలై ఆశించిన ఫలితాన్ని అందుకోలేకపోయింది. థమన్ అందించిన సంగీతం పెద్దగా ప్రజల దృష్టిని ఆకర్షించలేకపోయింది. ఇటీవల థమన్ ఓ ఇంటర్వ్యూలో మాట్లాడుతూ, పాటలు జనాల్లోకి విస్తృతంగా చేరలేకపోవడానికి కారణం, అవి హిట్ అయ్యేలా రూపొందించడంలో కొంత విఫలమయ్యామని చెప్పాడు. ఇది అభిమానుల ఆగ్రహానికి కారణమైంది.

ఈ వ్యాఖ్యల నేపథ్యంలో చరణ్ సోషల్ మీడియాలో థమన్‌ను అన్‌ఫాలో చేశారని వార్తలు బయటకొచ్చాయి. అయితే, రామ్ చరణ్ టీమ్ ఈ వార్తలను ఖండిస్తూ, అతను అసలు థమన్‌ను ఎప్పుడూ ఫాలో చేయలేదని స్పష్టం చేసింది. చరణ్ సోషల్ మీడియాలో తన కుటుంబ సభ్యులు, కొద్దిమంది సన్నిహితులను మాత్రమే ఫాలో అవుతారని టీమ్ చెప్పింది.

థమన్ మాట్లాడుతూ, ‘గేమ్ ఛేంజర్’ పాటలు యూట్యూబ్‌లో అనుకున్న స్థాయిలో వ్యూస్ రాబట్టలేదని, పాటలన్నీ మ్యూజిక్ డైరెక్టర్ వల్ల మాత్రమే విజయవంతం కావని, హుక్ స్టెప్‌ల లేమి వల్లనే జనాలకి పెద్దగా కనెక్ట్ కాలేదని అభిప్రాయపడ్డాడు. ఈ వ్యాఖ్యలు మెగా అభిమానుల్లో తీవ్ర వ్యతిరేకతను రేకెత్తించాయి.

కొంతమంది అభిమానులు థమన్ వ్యాఖ్యలను తప్పుబడుతూ, మంచి ట్యూన్స్ లేకపోవడమే పాటలు విఫలమయ్యే కారణమని, ఈ పరిస్థితిని ఇతరులపై నెట్టడం తగదని అంటున్నారు. ‘నందమూరి థమన్’ అని పిలిపించుకునే వ్యక్తి చరణ్ సినిమా గురించి ఇలాంటి వ్యాఖ్యలు చేయడం తగదని ఫ్యాన్స్ పేర్కొంటున్నారు.

ఈ చర్చలకు చెక్ పెడుతూ రామ్ చరణ్ టీమ్ ఈ వార్తల్లో నిజం లేదని స్పష్టం చేయడంతో, వివాదానికి స్వల్ప స్థాయిలో తెరపడింది.

Also Read : Brahmamudi Serial Today Episode