Heavy Rain Alert Hyderabad :హైదరాబాద్లో మూడురోజులుగా వరుణుడు విశ్వరూపం చూపిస్తూ నగర వాసులను ఇబ్బందులకు గురి చేస్తున్నాడు. ఈ నేపథ్యంలో వాతావరణ శాఖ మరోసారి Heavy Rain Alert జారీ చేసింది. బంగాళాఖాతంలో ఏర్పడిన అల్పపీడనం ప్రభావంతో రాబోయే 24 గంటల్లో భారీ నుంచి అతి భారీ వర్షాలు కురిసే అవకాశం ఉందని అధికారులు హెచ్చరిస్తున్నారు. ముఖ్యంగా మధ్యాహ్నం 1 గంట నుంచి రాత్రి 11 గంటల వరకు మోస్తరు నుంచి భారీ వర్షాలు ఉరుములు, మెరుపులతో కూడి పడే అవకాశం ఉందని చెబుతున్నారు. ఈ సమయంలో హైదరాబాద్లోని అనేక ప్రాంతాల్లో 25 మి.మీ. నుంచి 55 మి.మీ. వర్షపాతం నమోదయ్యే అవకాశం ఉందని సమాచారం. రాత్రి 11 గంటల నుంచి మంగళవారం ఉదయం 8 గంటల వరకు కూడా మోస్తరు వర్షాలు కొనసాగే అవకాశం ఉన్నట్లు వాతావరణ శాఖ వెల్లడించింది.
సాయంత్రం వేళ వర్షపాతం మరింత పెరిగే అవకాశం ఉందని అధికారులు హెచ్చరిస్తున్నారు. భారీ వర్షాల దృష్ట్యా వాహనదారులు తమ ప్రయాణ ప్రణాళికలను ముందుగానే సిద్ధం చేసుకుని, ట్రాఫిక్ రద్దీ ప్రాంతాలను తప్పించుకోవాలని సూచిస్తున్నారు. ప్రత్యేకంగా సైబరాబాద్ ట్రాఫిక్ పోలీసులు ప్రజలకు అప్రమత్తంగా ఉండాలని, తక్కువ లోతు ఉన్న రహదారులను మాత్రమే వాహన ప్రయాణానికి ఉపయోగించాలని సూచించారు.
అకస్మాత్తుగా వర్షం ప్రారంభమయ్యే అవకాశం ఉన్నందున బయటకు వెళ్లే వారు తప్పనిసరిగా జాగ్రత్తలు పాటించాలని అధికారులు చెబుతున్నారు. అత్యవసర పరిస్థితులు తప్ప వర్షం సమయంలో బయటకు వెళ్లకుండా ఉండాలని సూచిస్తున్నారు. భారీ హోర్డింగ్లు, చెట్ల కింద నిలబడటం ప్రమాదకరమని హెచ్చరించారు. వర్షం పడే సమయంలో బలహీనమైన నిర్మాణాల దగ్గరగా ఉండకూడదని, అలాగే వరద నీటిలో మాన్హోల్స్ గుర్తించడం కష్టమవుతుందనే కారణంగా ఆ ప్రాంతాలను తప్పించుకోవాలని విజ్ఞప్తి చేస్తున్నారు.
తీవ్ర వర్షాల కారణంగా నగరంలో ట్రాఫిక్ సమస్యలు తలెత్తే అవకాశం ఉండటంతో, సాధ్యమైనంతవరకు వర్క్ ఫ్రం హోమ్ను అమలు చేయాలని ప్రజలు, సంస్థలకు సూచిస్తున్నారు. ఇటీవల ప్రతి సాయంత్రం ఆఫీస్ సమయం ముగిసే సమయంలో వర్షం కురవడం వల్ల ట్రాఫిక్లో ఇరుక్కుపోవడం, నీటితో నిండిన రోడ్లలో మాన్హోల్స్ ప్రమాదం పెరగడం వంటి సమస్యలు ఎదురవుతున్నాయి. ఈ పరిస్థితుల్లో ముందస్తు జాగ్రత్తలు మాత్రమే భద్రతను కల్పిస్తాయని అధికారులు చెబుతున్నారు.
Also Read : Viral Video : సింహం నోటికి దగ్గరగా వెళ్లిన యువకుడు…తర్వాత ఏం జరిగిందో చూస్తే షాక్
